វត្តពុទ្ធសាសនាមួយ កំពុងបញ្ចេញរូបរាង នៅតំបន់ឈូងសមុទ្រ

ផ្នែកទីបី

គម្រោងសាងសង់នៅវត្តខ្មែរកម្ពុជាក្រោម កំពុងតែបន្តការរីកចម្រើនទៅមុខយ៉ាងសកម្ម នៅលើគ្រប់ផ្នែកការងារទាំងអស់ ខាងផ្នែកតុបតែងដំបូល យើងបានចូលមកដល់ដំណាក់កាលកំពុងលាបពណ៌ ស្របគ្នានឹងក្បាច់ជួរជើងជញ្ជាំងក៏កំពុងត្រូវបានដំឡើងផងដែរ ។ ចំណែកខាងព្រះវិហារឯណោះវិញ ក្រឡាពណ៌ក្បឿងប្រក់នៅលើដំបូលក៏កំពុងបង្ហាញអត្តសញ្ញាណនៃទីសក្ការៈឲ្យកាន់តែលេចធ្លោឡើង ។ ក្នុងផ្នែកវិវឌ្ឍនៅលើការងារបញ្ចប់ទាំងនេះ បានបង្ហាញពីការផ្លាស់ប្តូរដ៏សំខាន់មួយក្នុងដំណើរការសាងសង់ ។

អត្ថបទនេះគឺជាផ្នែកទី ៣ នៃលំដាប់ថ្នាក់ឯកសារសាងសង់ រៀបចំឡើងក្រោមកិច្ចសហការរវាងក្រុមស្ថាបត្យកម្ម អែនឌ្រូម៉ាន់ និងមូលនិធិពុទ្ធសាសនាខ្មែរ (Andrew Mann Architecture (AMA) and A Khmer Buddhist Foundation)

កិច្ចការនេះ ពាក់ព័ន្ធនឹងការសិក្សា ពិគ្រោះយោបល់ ការកែតម្រូវជាបន្តបន្ទាប់ ។ អ្នកជំនាញខាងតុបតែងត្រូវសិក្សាពីលំនាំសិល្បៈខ្មែរ និងបំប្លែងជាវិធីសាស្ត្រដែលអាចជួយឲ្យក្រុមការងារនៅការដ្ឋានសំណង់បានយល់ច្បាស់ ហើយធ្វើបានត្រឹមត្រូវតាមទម្រង់ដើមរបស់រចនាបថក្បាច់ខ្មែរ ។ ក្នុងដំណាក់កាលដំបូង ក្រុមការងារបានចាប់ផ្តើមដោយការសាកល្បងផ្គុំពិសោធន៍ រកបច្ចេកទេសក្នុងផ្នែកតូចសិន រួចហើយទើបពង្រីងទៅកាន់ទ្រង់ទ្រាយធំទាំងមូលតែម្តង ។

ដំបូលព្រះវិហារ

កិច្ចការផ្នែកដំបូលបានប្រព្រឹត្តទៅជាបន្តបន្ទាប់ច្រើនខែមកហើយ ។ បន្ទាប់ពីយើងបានបញ្ចប់ដំបូលអគារឧបដ្ឋានសា លាមក ការយកចិត្តទុកដាក់បានផ្លាស់មកកាន់ដំបូលព្រះវិហារវិញ ។ ដំបូលវិហារបែបស្ថាបត្យកម្មខ្មែរមានលក្ខណៈទ្រេតខ្លាំង និងប្រើបន្ទះក្បឿងច្រើន ដែលជាធាតុមួយដ៏សំខាន់បង្កើតអត្តសញ្ញាណឲ្យអគារទាំងមូល ។ នៅរដ្ឋកាលីហ្វ័រនៀ រចនាបថនេះកម្រមានណាស់ វាធ្វើឲ្យព្រះវិហារមានសភាពលេចធ្លោ និងប្លែកភ្លាមឡើងមួយរំពេច ។

វិធីប្រក់ក្បឿងដំបូលយើងបានយកលំនាំគំរូបែបស្ថាបត្យកម្មខ្មែរ ទាំងទ្រង់ទ្រាយ និងពណ៌របស់ក្បឿង ។ លំនាំរាងជ្រុងពេជ្រ និងស្រកានាគ ដែលជាសត្វទេវកថាក្នុងវប្បធម៌ខ្មែរ ដែលគេជឿថាជាអ្នកការពារព្រះធម៌ និងស្ថានទីបរិសុទ្ធសម្រាប់គោរពបូជា ។

ចំណែកពណ៌ទាំងឡាយនេះ ក៏មានន័យជានិមិត្តរូបជ្រាលជ្រៅណាស់ដែរ ៖ ពណ៌លឿង តំណាងឲ្យការត្រាស់ដឹង ពណ៌ខៀវតំណាងឲ្យសន្តិភាព និងការណែនាំ ខណៈពេលពណ៌បៃតងបង្ហាញពីភាពរួបរួម និងសុខសាន្ត ។ លំនាំ និងពណ៌ទាំងនេះ ជួយបញ្ជាក់អត្តសញ្ញាណអគារ ថាជាបូជនីយដ្ឋាន ជាសញ្ញានៃស្ថានទីសក្ការៈសម្រាប់សហគមន៍ ។

ប្រព័ន្ធលូបង្ហូរទឹកត្រូវបានដំឡើងនៅកន្លែងសំខាន់ៗ ហើយកម្ពស់ដីក៏ត្រូវបានរៀបចំយ៉ាងប្រុងប្រយ័ត្ន ដើម្បីធានាឲ្យទឹកហូរទៅតាមទិសដៅត្រឹមត្រូវ ។ ទោះបីជាផ្នែកការងារនេះមិនបញ្ចេញឲ្យឃើញក្រោយពេលបញ្ចប់ក៏ដោយ ក៏ប៉ុន្តែវាមានតួនាទីសំខាន់ក្នុងការរក្សាប្រសិទ្ធិភាពនៃទីតាំងសម្រាប់រយៈពេលវែងតទៅថ្ងៃមុខ ។

ដំណាក់កាលជិតបញ្ចប់

ក្រុមការងារកំពុងឈានចូលដល់ដំណាក់កាលចុងក្រោយនៃការបិទផ្ទៃខាងក្នុង ។ ទព្វសម្ភារៈ សម្រាប់ទប់ចំហាយធាតុ ក្តៅ-ត្រជាក់ត្រូវបានបំពាក់រួចរាល់ហើយ រីឯផ្ទៃជញ្ជាំងក៏កំពុងមកដល់ផ្នែកខាត់សំអាតបញ្ចប់ផ្ទៃបាតទ្រាប់ពីក្រោមហើយដែរ ។

ដំណាក់កាលនេះ ទាមទារការយកចិត្តទុកដាក់កាន់តែខ្ពស់ ពីព្រោះក្រោយពីការបិទជញ្ជាំង ប្រសិនបើមានការកែប្រែ ឬថែមថយផ្នែកណាមួយនៃសំណង់ ឬត្រូវការបើកច្រកណាមួយនោះ នឹងនាំឲ្យមានការលំបាកកាន់តែច្រើន ។