វត្តព្រះពុទ្ធសាសនាមួយកន្លែង លេចចេញនៅតំបន់ឈូងសមុទ្រ

ផ្នែកទីពីរ

​​ដំណើរការសាងសង់បន្តប្រព្រឹត្តទៅរៀងរាល់ថ្ងៃនៅវត្តកម្ពុជាក្រោម ។ គេឃើញបុគ្គលិក-កម្មករ ជាក្រុមការងារគ្រប់ផ្នែកទាំងអស់បានមកជុំគ្នានៅការដ្ឋាន មុនពេលអរុណរះរៀងរាល់ថ្ងៃ ។ ហើយសកម្មភាពការងារទាំងឡាយក៏ចាប់ផ្តើមឡើង ទន្ទឹមគ្នានឹងពន្លឺព្រះសូរិយាចាប់ផ្តើមបំភ្លឺបរិវេណវត្តផងដែរ ។ វឌ្ឍនភាពរបស់រូបរាងសំណង់បានរំលេចចេញតាមលំដាប់លំដោយ នៅក្រោមរចនាបទ និងកិច្ចសហប្រតិបត្តិការដ៏មានទំនុកចិត្តរបស់ក្រុមស្ថាបត្យករដៃគូរបស់យើងនៅប្រទេសកម្ពុជា  ។ នៅក្រោមការសម្រិតសម្រាំងនិងផ្ចិតផ្ចង់ជាជំហានៗ គ្រោងសំណង់អគារវត្តកំពុងបង្ហាញរូបរាងរបស់ខ្លួនសន្សឹមៗមកហើយដែរ ។

នៅប្រទេសកម្ពុជាឯណោះវិញ ៖

​នៅក្នុងសរទៈរដូវ (រដូវរំហើយ) នេះ ក្រុមស្ថាបត្យកម្ម​ អែនឌ្រូ ម៉ាន់ បានធ្វើដំណើរទៅប្រទេសប្រទេសកម្ពុជាម្តងទៀត ក្នុងការបន្តកិច្ចរួមសហការដៃគូ ជាមួយក្រុមស្ថាបត្យកម្ម អេ.អូ (AO Architects) នៅទីក្រុងភ្នំពេញ​ ។ យើងបានចុះទៅដល់រោងជាងដោយផ្ទាល់ ដើម្បីពិនិត្យមើលចំណុចសំខាន់ៗនៃគម្រោងការងារផ្នែកវប្បធម៌ចម្លាក់នៅទីនោះ ។

គំនូរមត៌កក្បាច់រចនាដែលត្រូវបានអនុវត្តន៍បន្តតាំងពីរាប់សតវត្សរ៍មកហើយនោះ សព្វថ្ងៃនេះក្រុមសិប្បករខ្មែរ កំពុងតម្លើងស្ពានភ្ជាប់ចម្លាក់ប្រពៃណីបុរាណ ឲ្យចូលស៊ីសង្វាក់គ្នាជាមួយនឹងសំណង់សម័យទំនើប គឺការបញ្ចូលបច្ចុប្បន្នកាលជាមួយនិងអតីតកាលឲ្យចូលមកជិតដិតជាប់គ្នា ។ ដំណើរកិច្ចការនេះ គឺក្នុងបំណងធានាឲ្យបាននូវដំណាក់កាលវិវឌ្ឍន៍នៃសំណង់របស់យើងមានភាពសុក្រឹត នៅលើគ្រប់ផ្នែកដែលត្រូវតភ្ជាប់ ។

នៅឯការដ្ឋានសាងសង់ រដ្ឋកាលីហ្វ័រនៀ

ត្រឡប់មកកាន់ ទីក្រុងសាន់ហូស្សេ នៅទីការដ្ឋានសំណង់វត្តដែលកំពុងបន្តពេញបន្ទុក ។ ចេញពីអគារសហគមន៍ នៅមានទីធ្លាដែលយើងអាចមើលឃើញធ្លាយទៅឧបដ្ឋានសាលា  និងរោងចម្អិនអាហារប្រចាំថ្ងៃ និងព្រះវិហារនៅប៉ែកខាងកើត ។ សំយ៉ាបបន្ថែមកំពុងចេញរូបរាង ។ ក្រុមបច្ចេកទេសកំពុងដល់ដំណាក់កាលបង្ហើយប្រព័ន្ធអគ្គិសនី និងប្រព័ន្ធទឹក ។ ផ្នែករចនាបទក៏កំពុងបន្តពេញបន្ទុកទូទាំងការដ្ឋាន តាមទួនាទីរៀងៗខ្លួន ដើម្បីសម្រួលឲ្យគម្រោងកាន់តែមានល្បឿនទៅមុខ ក្នុងផ្លូវដ៏គួរជាទីចាប់ចិត្តក្រៃលែង ។

ការចាក់ប៉េតុង និង សួនសមាធិ

នៅក្នុងសួនសមាធិ ផ្ទាំងប៉េតុងថ្មីកំពុងដំណើរការទៅមុខ ។ នៅទីនេះ នឹងបម្រើឲ្យអ្នកប្រាថ្នាភាពស្ងប់ស្ងាត់ ធ្វើសតិប្បដ្ឋាន តាំងចិត្តពិចារណាស្វែងរកវិធីរំដោះខ្លួនចេញពីសេចក្តីទុក្ខ សម្ងប់អារម្មណ៍ដើម្បីសន្តិភាពផ្លូវចិត្ត ។

កៅអីធ្វើពីប៉េតុងដែលទើបចាក់ហើយថ្មីៗ កំពុងចាប់ផ្តើមរៀបពង្រាយនៅតាមព្រំគែមៗសួនច្បារ ។ មិនដូចគ្នាទៅនឹងការចាក់ប៉េតុងតាមគែមជុំវិញ​ ដែលថ្ងៃក្រោយអាចត្រូវគ្របបាំងជិតដោយស្មៅ ឬមែកឈើនោះទេផ្ទាំងប៉េតុងនេះ នឹងនៅបង្ហាញមុខយ៉ាងពេញលេញ ។ កម្រិតនៃការងារបញ្ចប់នេះ ទាមទារការស៊ីសង្វាក់គ្នាជាចាំបាច់ ។ ក្រុមការងារត្រូវចាក់សសរបង្គោល រួចបកពុម្ពចេញ និងបំពេញសសរចុងក្រោយក្នុងលំដាប់ជាប់គ្នា ដើម្បីធានាបាននូវលទ្ធផលរលូន និងស៊ីសង្វាក់គ្នាបំផុត ។

ប្រតិបត្តិការនេះ ត្រូវប្រើបទពិសោធន៍ និងទំនុកចិត្តខ្ពស់ ។ សមាជិកក្រុម ត្រូវយល់ច្បាស់ពីតួនាទី និងភារកិច្ចរបស់ខ្លួនម្នាក់ៗ  ប្រព័ន្ធការងារបត់បែន និងការពិគ្រោះយោបល់គ្នា ការតាំងចិត្ត និងទឹកចិត្តស្រឡាញ់ ។ លទ្ធផលមើលឃើញដូចជាសាមញ្ញទេ ប៉ុន្តែដំណើរការដើម្បីទៅដល់ទីនោះ ពិតជាមិនសាមញ្ញសោះឡើយ ។

ផ្នែកកុដិព្រះសង្ឃគង់នៅ

កុដិព្រះសង្ឃគង់ ស្ថិតនៅលើជាន់មួយដែលបានកំណត់ នៅលើអគារសហគមន៍ធំទូលាយ  ។ នៅខាងក្នុង បន្ទប់តូចៗមួយចំនួន កំពុងលេញចេញរូបរាងហើយដែរ កន្លែងនេះ គឺសម្រាប់បម្រើឲ្យការរស់នៅប្រចាំថ្ងៃរបស់ព្រះសង្ឃ ។

ពុទ្ធសាសនា គណៈថេរវាទ បង្កើតឡើងឈរលើមូលដ្ឋានទំនុកចិត្ត សាមគ្គីភាព រវាងសង្ឃ និងសង្ឃ បរិស័ទ និងបរិស័ទ និងសង្ឃនិងបរិស័ទ ។ ព្រះសង្ឃប្រឹងប្រែងខ្លួនក្នុងកិច្ចប្រតិបត្តិកិច្ចសិក្សា និងកិច្ចប្រៀនប្រដៅ ។ ជាកិច្ចតបវិញ ប្រជាពុទ្ធបរិស័ទផ្តល់ការទំនុកបម្រុង ឧបត្ថម្ភអាហារ និងបច្ច័យ ៤ ។ ការផ្តល់ឲ្យគ្នា ទៅវិញទៅមកបែបនេះ គឺជាគ្រឹះដ៏រឹងមាំនៃសប្បុរសធម៌ មេត្តាចិត្តចំពោះគ្នានឹងគ្នា និងការរួមចំណែកទទួលខុសត្រូវក្នុងជីវភាពសហគមន៍ ។

ដូចដែលបានរៀបរាប់ជូនក្នុងវគ្គទី ១ រួចមកហើយ អំពីការកាន់វស្សារយៈពេល ៣ ខែរបស់ព្រះសង្ឃ ក្នុងរដូវភ្លៀងជោគជាំនោះ ។ ក្នុងរយៈពេលនោះ ជាពេលដែលព្រះសង្ឃសម្ងំស្ថិតនៅក្នុងវត្តនិមួយៗ ដើម្បីផ្តោតចិត្តប្រតិបត្តិ ព្រះធម៌វិន័យ និងសមាធិ ។ នៅបន្ទាប់ពីចេញវស្សា គឺជារដូវ បុណ្យកឋិន រយៈមួយខែពេញ ។ ក៏ក្នុងរដូវកឋិននេះដែរ ពុទ្ធបរិស័ទទំនុកបម្រុងសំពត់ចីវរ និងគ្រឿងបរិក្ខារប្រើប្រាស់ប្រចាំថ្ងៃផ្សេងៗចំពោះព្រះសង្ឃ ។ កាយវិការទាំងនេះគឺជានិមិត្តរូបនៃការបន្តផ្សាភ្ជាប់ជានិច្ច នូវកិច្ចចែករំលែកសេចក្តីសុខឲ្យគ្នាទៅវិញទៅមក ក្នុងការពង្រឹងភាពជិតស្និទ្ធថែទាំគ្នានៃសង្គមសង្ឃ និង ប្រជាពុទ្ធបរិស័ទ ។

នៅក្នុងឱកាសនៃការវិលត្រឡប់ទៅកាន់ប្រទេសកម្ពុជាវិញម្តងទៀតនោះ ក្រុមការងារបានឆ្លៀតចូលគោរពថ្វាយបង្គំ និងជួបពិភាក្សាជាមួយ សម្តេចព្រះមហាអរិយវង្ស បណ្ឌិត យ៉ន សេង យៀត ព្រះសង្ឃមួយអង្គមានឋានៈខ្ពស់ក្នុងចំណោមគណៈសង្ឃថ្នាក់ខ្ពស់នៅក្នុងប្រទេស និងជាព្រះសង្ឃមួយរូបមានទម្ងន់សម្លេងក្នុងវិស័យទស្សនវិជ្ជាព្រះពុទ្ធសាសនា ។ ទស្សនៈ និងបទបង្ហាញរបស់ព្រះអង្គបានផ្តល់នូវការរំលឹកដ៏មានអត្ថន័យ អំពីតម្លៃ និងគុណធម៌ ដែលបូជនីយដ្ឋានថ្មីត្រូវបើកបម្រើជាប្រយោជន៍ដល់សាធារណជន ។

ក្នុងខណៈពេលដែលការកសាងបន្តទៅមុខនៅរដ្ឋកាលីហ្វ័រនៀ ក្រុម អេ.អឹម.អេ (AMA) និងមូលនិធិពុទ្ធសាសនាខ្មែរ បន្តដំណើរទៅមុខដោយភាពស្ងប់ស្ងាត់ និងមុតមាំ និងឆន្ទៈរួម ក្នុងគោលបំណង គោរពប្រពៃណី ដែលលាតសន្ធឹងឆ្ងាយហួសពីការដ្ឋានសំណង់វត្ត ហើយនិងដែលផ្តើមចេញពីការហត្ថកម្ម បញ្ញា និងការបូជារបស់មហាជន ។

< Return to Part One

Andrew Mann Architecture
Architecture

AO Architects, Phnom Penh
Traditional ornamentation and design

Antonio Martins Interior Design
Interior Architecture

Strata Landscape Architecture
Landscape Architecture

OARCON
Contractor

Saul Estrada
Photography